إعتداء أحد الأتراك العنصريين على شاب مصري الجنسية
تعرض شاب مصري الجنسية في ولاية اسطنبول للضرب من قبل أحد الأتراك العنصريين ظنا منه أنه سوري الجنسية
السبب الذي دفع بهذا الشاب ليكتب ما حصل له على أحد صفحات الميديا قائلا :
السلام عليكم ورحمة الله وبركاته..
“مبدئياً انا مبحكيش الموقف ده عشان اشتكي لكن لو حد يقدر يوصل الموضوع ده للإعلام في تركيا أكون شاكر ليكوا.
كنت راكب مع أختي ومرات أخويا واختها وطفله رضيعة من “YeniBosna” بإتجاه “KayaŞehir” اوتوبيس رقم 79F
مكان الواقعه: Eski habipler mah, Sultangazi/Istanbul
اللي حصل اني جيت قبل المحطة اللي هنزل فيها وقفت وبجهز العربية لمرات اخويا عشان تحط فيها البيبي راح
لقيت التركي ده واقف جنبي و باين عليه عنصري جداً ومتعصب من كلامنا باللغة العربية والإنجليزية. مع العلم ان
كلامنا في الأوتوبيس بدون صوت عالي خالص مراعات للركاب.
المهم ظن اننا سوريين “مع احترامي لأخواتنا السوريين” فجأة لقيته بيقولي بالتركي:
“Niye beni Sıkıştırıyorsunuz, Allah Allah”
بزعيق طبعاً فانا استغربت جداً لأني ملمسوتش اصلا ولا جيت جنبه فاقلتله هو انا جيت جنبك؟ مالك متعصب ليه؟قالي:
“Kes sesini konuşma yoksa vururum seni”
رحت قايله انت عشان اكبر مني فانا محترمك لكن الزم حدك وانا بتكلم راح بدأ الضرب وكان اول ضربة اللي كسرتلي
أنفي وبدأت انزف دم وزق الطفله اللي كانت مع مرات اخويا وتعدى عليهم وسط الخناقة لأنهم اضطروا يحوشوا اللي
بيحصل وانا طبعاً دفاعاً عن نفسي بدأت اروح اضربه هو كمان خلال الوقت ده الأوتوبيس وقف والناس اتلمت وقعدت
تحجز والراجل بدأ يتهجم تاني بدأت ادافع واروح اضربه وهكذا، جه يجري يركب الاوتوبيس رحت وراه عشان انزله
وقلت للسواق مش هتتحرك كان في صفه وقالي انا مش هاخد الأمر منك، رحت سايبهم ورحت وقفت قدام
الأوتوبيس وقلتله مش هتمشي.
واتصلت ب155 بعتولي الJandarma والإسعاف وبعد كدة الراجل اخوه جه وقعد يعتذر, الإسعاف وصلت واخدتني
على المستشفى طبعاً في كدمات كتير في وشي وراسي وشرخ في صوابع إيدي الإتنين ولما رحت المستشفى
طلبت اعمل التقرير والراجل اخدوه على القسم وفضل هناك من 5 الى 6 ساعات لحد لما انا اجي و أدلي بإفادتي
لكن اصريت اني اروح تاني يوم عشان كنت مريض ودايخ ومش قادر اروح, وبعد كدة رحت أدليت بإفادتي تاني يوم
و منتظر تحديد جلسة للقضية, و الشرطة قدمت طلب عشان آخد الفيديو من الأوتوبيس و يتضاف في القضية.
الشاهد اني شايف ان الموضوع بقى زايد اوي في موضوع العنصرية ده وبقت حاجة تقرف فالازم ناخد موقف
عشان كدة ياريت لو في حد شغال في مواقع إخبارية في تركيا آكون ممنون وشاكر للمساعدة عشان نقدر
نوصل ده للإعلام والحكومة عشان يتاخد موقف من التعدي على محارمنا.
*لا فرق بين عربي واعجمي، ونفسي يفهموا اننا كلنا مسلمين*
ملحوظة الشرطة كانت متعاونة جداً جداً وكانوا قمة في الإحترام!!
